వేమన పద్యములు ప్రథమాశ్వాసము(81-100)

81.పరుస మినుముసోకి బంగారమైనట్లు
కప్పురంబు జ్యోతిఁ గలసినట్లు
పుష్పమఁదు దావి పొసఁగినట్లగు ముక్తి
విశ్వదాభిరామ వినుర వేమ

82.కుండ పగిలెనేని క్రొత్తది కొనవచ్చు
భూతలంబునందు బొందుగాను
కూలబడిన నరుఁడు కుదురుట యరుదయా
విశ్వదాభిరామ వినుర వేమ

83.సతము బాహ్యపూజ చాలఁజేసినపిదప
కపటము విడలేక కష్ట నరులు
ముక్తినొందలేక మునిగిరి తమమున
విశ్వదాభిరామ వినుర వేమ

84.ఊర్ధ్వలోకమందు నుచితక్రమంబున
రూప మేమి లేక రూఢితోను
పరమయోగి చూచు పరమాత్ముఁడితడని
విశ్వదాభిరామ వినుర వేమ

85.సత్య మమరియుండ జ్ఞాన మమరియుండు
జ్ఞాన మమరియుండ సత్యముండు
జ్ఞానసత్యములును సమయమయిన ద్విజుఁడగు
విశ్వదాభిరామ వినుర వేమ


86.దాన మొసఁగుకన్నఁ దేజంబు మఱిహెచ్చు
తేజ మొసఁగుకన్నఁ దెలివి హెచ్చు
తెలివికన్న నాసఁ దెగ వేయునది హెచ్చు
విశ్వదాభిరామ వినుర వేమ

87.దొంగమాటలాడ దొరుకునె మోక్షంబు
చేతగానికూత చెల్ల దెవుడు
గురువుపద్దు గాదు గుణహీన మగుఁగాక
విశ్వదాభిరామ వినుర వేమ

88.గాలిలేని దీపకళిక చందంబున
నలలుసుళ్ళులేని జలధిరీతి
నిశ్చలాత్మయున్న నిర్వికారంబున
ముక్తియండ్రు దాని మొగిని వేమ

89.మంటలోహములను మ్రాను చీలలయందు
పటముగోడలందుఁ బరగ నిసుక
బెట్టనంటునట్ల పెనఁగు దేహముజీవి
విశ్వదాభిరామ వినుర వేమ

90.కలుషమెల్లఁ దెలియఁ దలవంపులకు మూల
మరయఁదత్వ మెల్ల నాత్మఁబుట్టు
తెలిసినందుకు మఱిధీరుఁడు గావలె
విశ్వదాభిరామ వినుర వేమ


91.అనఁగ ననగ రాగ మతిశయిల్లుచునుండు
తినఁగఁ దినఁగ వేము దీయనుండు
సాధనమునఁ బనులు సమకూరు ధరలోన
విశ్వదాభిరామ వినుర వేమ

92.స్థూలము కనుగ్రుడ్డు సూక్షంబు కన్పాప
కంటిపాప నుండు కారణంబు
కారణమున బ్రహ్మకళ నెఱుగంగవలె
విశ్వదాభిరామ వినుర వేమ

93.తేనెతెరలజాడ తేనెటీఁగ యెఱుంగు
సుమరసంబుజాడ భ్రమర మెఱుఁగు
పరమయోగి జూడభక్తుం డెఱుంగును
విశ్వదాభిరామ వినుర వేమ


94.అడవి దిరుగ లేదు ఆకసమున లేదు
అవనిఁ దీర్థయాత్రలందు లేదు
ఒడలు సిద్ధిఁజేసి యొడయని జూడరా
విశ్వదాభిరామ వినుర వేమ

95.కప్పురంపు మనసు గాంక్షించుయోగికి
జ్ఞా నదీపశిఖయుఁ దానటించుఁ
గానవచ్చు నాత్మ క్రమమాణమై నిచ్చ
విశ్వదాభిరామ వినుర వేమ

96.నీ వాడిన నే నాడుదు
నీవుండిన నేను నుందు నిర్విణ్ణుఁడనై
నీవు తలంచినఁదలఁపుదు
నీవు నగిన నేను నగుదు నిజముగ వేమా

97.నీరు కార మాయె కారంబు నీరాయె
కారమైన నీరుకార మాయె
కారమందు నీరు కడురమ్యమైయుండు
విశ్వదాభిరామ వినుర వేమ

98.శివుని యనుభవంబు స్రుష్టిలోపల లేక
సంశయంబు చెడదు సాధకులకు
చెలఁగుదివ్వె లేక చీఁకటీపాయునా
విశ్వదాభిరామ వినుర వేమ

99.ఇంద్రియములచేత నెగ్గొందుచుండెడు
వెఱ్ఱిమనుజుఁ డేల వెదకు శివుని
ఇంద్రియముల రోసి ఈశునిఁ జూడరా
విశ్వదాభిరామ వినుర వేమ

100.కడుపునిండ సుధను గ్రమముతోఁ ద్రావిన
బాలమీఁద నేలపాఱు మనసు
తత్వ మెఱుఁగువెనక తన్వంగులేటికో
విశ్వదాభిరామ వినుర వేమ