141.ఎన్నాళ్ళకుఁ దానుండును
ఎన్నాళ్ళను దాని నేర్చి యెన్నిటవెలయుఁ
కొన్నాళ్ళకుఁ దాఁజన్నను
మన్నేయగు విద్యలెల్ల మహిలో వేమా
142.ధనమెచ్చిన మదమెచ్చును
మదమెచ్చిన దుర్గుణంబు మానక హెచ్చుఁ
ధనముడుగిన మదముడుగును
మదముడిగిన దుర్గుణంబు మానును వేమా
143.వినవలె నెవ్వరు చెప్పిన
వినినంతనె తమక పడక వివరింపవలె
విని కని వివరము దెలిసిన
మనుజుఁడెపో నీతిపరుఁడు మహిలో వేమా
144.ఈకపట నాటకంబును
ఈకపటపుఁ జదువులన్ని యింపు దలిర్ప
ఏకపటాత్ముఁడు సేసెనొ
యాకపటాత్మునకు మ్రొక్కి యలరుము వేమా
145.ఎండవేళఁ జీఁక టేకమైయున్నట్లు
నిండుకుండ నీరు నిలిచినట్లు
దండిగఁ బరమాత్మ తత్వంబు దెలియరా
విశ్వదాభిరామ వినుర వేమ
146.ఎండినమ్రా నొక టడవిని
నుండిన నందగ్ని పుట్టి యూడ్చును చెట్ల
దండిగలవంశ మెల్లను
చండాలుం డొకఁడుపుట్టి చెఱుచును వేమా
147.శిష్యవర్గమునకు శివుఁ జూపనేరక
కానిమతములోని గలుగునట్టి
గురునియెఱుక నరయ గ్రుడెద్దు చేనురా
విశ్వదాభిరామ వినుర వేమ
148.ఇంటిలోనిధనము నిదినాది యనుచును
మంటిలోనఁ దాచు మంకుజీవి
కొంచఁబోడు వెంట గుల్ల కాసును రాదు
విశ్వదాభిరామ వినుర వేమ
149.దేశవేశములను తేటసేయక దేవుఁ
డాత్మలోన నుండు ననగిపెనగి
వేషమరసిచూడ గ్రాసంబు కొఱకయా
విశ్వదాభిరామ వినుర వేమ
150.మిఱపగింజ జూడ మీఁద నల్లగనుండుఁ
గొఱికిచూడలోన చుఱుకుమనును
సజ్జను లగువారి సారమిట్టుల నుండు
విశ్వదభిరామ వినుర వేమ
151.పర్వత వనవాసి పరిణామ వర్తన
కూపవాసి కెట్టు గుఱుతుపడును
బ్రహ్మవిష్ణువెంటఁ బ్రాక్రుతుఁ డరుగునా
విశ్వదాభిరామ వినుర వేమ
152.కస్తూరి యటుచూడఁ గాంతి నల్లగనుండు
పరిమళించుదాని పరిమళంబు
గురువులయినవారి గుణము లీలాగురా
విశ్వదాభిరామ వినుర వేమ
153.దొంగతనము ఱంకు దొరసియుండుర జగతి
ఱంకులాడికింత శంకపుట్టు
దొంగకన్న ఱేవెలుం గొప్పకానట్లు
విశ్వదాభిరామ వినుర వేమ
154.గురువులేక విద్య గుఱుతుగా దొరకదు
న్రుపతిలేక భూమి త్రుప్తిగాదు
గురువు విద్య లేక గురుతర ద్విజుఁడౌనె
విశ్వదాభిరామ వినుర వేమ
155.అల్పసుఖములెల్ల నాశించి మనుజుండు
బహిళ దుఃఖములను బాధపడును
పరసుఖంబు నొంది బ్రకుతంగ నేరఁడు
విశ్వదాభిరామ వినుర వేమ
156.కాలవశముఁ బట్టి కర్మజీవులపిండు
మత్తులగుచును మదమత్తులైరి
మత్తులయిన జనుల మనసేటి మనసయా
విశ్వదాభిరామ వినుర వేమ
157.కడిగివట్టియాస కడతేఱనీయదు
ఇడుములండుఁ బెట్టి యీడ్చుఁగాని
పుడమి జనులభక్తిఁ బొడమంగ నియ్యదు
విశ్వదాభిరామ వినుర వేమ
158.పాలలోన బులుసు లీలతోఁగలిసిన
విఱిసి తునుక లగును విరివిగాను
తెలివి మనసులోన దివ్యతత్వము తేట
విశ్వదాభిరామ వినుర వేమ
159.దేహము లెస్సగ నుండిన
పోషణ తత్వంబులన్ని పొందుగఁ దెలియు
దేహము బడలికఁ బడినను
పోషణ తత్వములు వచ్చి పొందవు వేమా
160.ధర్మమరసి పూని ధర్మరాజాదులు
నిర్మలంపు ప్రౌఢి నిలుపుకొనిరి
ధర్మమే న్రుపులకు తారకయోగంబు
విశ్వదాభిరామ వినుర వేమ
No comments:
Post a Comment